მემარცვლე ფერმერთა გაერთიანების ხელმძღვანელის და კომპანია „შირაქის“ დამფუძნებლის ნიკოლოზ ბენიაიძის თქმით საერთო საჭიროების 20-25% ხორბალი მოგვყავს და ესეც შემცირდება.რუსეთიდან ფქვილის გაზრდილმა იმპორტმა ადგილობრივი მეხორბლე ფერმერები იმდენად დააზარალა, რომ მარცვლეულს თვითღირებულებაზე დაბალი ფასი აქვს
„როგორც წესი, მარცვლეულის ფასი ზამთარში იმატებს და ფერმერებმა ამ დროისათვის შეინახეს ხორბალი, რომ უფრო სარფიან ფასში გაეყიდათ და გასული წლის მოსავლის მისაღებად აღებული სესხები გადაეფარათ. გასული წლის ზაფხულში მოსავლის აღებისას ფასი 1 ლარი იყო და ლოგიკურად ზამთრისთვის უნდა გაზრდილიყო, თუმცა ახლა, ფასი 62 თეთრია. ყოველდღე ათობით ფერმერი მირეკავს და მეკითხება, სადმე უკეთესი ფასი ხომ არ არის, რომ ხორბალი გაყიდონ და სესხის გადაფარვა შეძლონ. ანალოგიური მდგომარეობა აქვთ ადგილობრივ წისქვილებს.
ადგილობრივი ფერმერი კოტრდება. 4.5 ლარად დამუშავდა და დაითესა ეს ნაკვეთები და რუსეთიდან შემოსული იაფი ფქვილის გამო ახლა თვითღირებულებას ვერ იღებენ. ჩვენმა ხელისუფლებამ რამე მექანიზმი უნდა შეიმუშაოს, რომ ადგილობრივ წარმოებას დაეხმაროს, თორემ ახლა რაც დათესილია, ისიც გადასაყრელი იქნება აღების პერიოდში. ისედაც, საერთო საჭიროების 20-25% ხორბალი მოგვყავს და ესეც შემცირდება. მთავრობის ეკონომიკურ გუნდთან ჩვენ გვქონდა შეხვედრა, მაგრამ იქ არ იყო გაშლილი ფართოდ ეს თემა. ვითხოვთ ამრეკლ გადასახადს, ან სხვა რამე მექანიზმს, რომ გადარჩეს ქართული ხორბლის წარმოება. მითუმეტეს, რომ თუ ადრე 83 ლარად შემოდიოდა 1 ტომარა ფქვილი, დღეს 55 ლარად შემოდის, მაგრამ პურს 5 თეთრზე მეტი არ დაკლებია. ანუ, ხეირობს ერთი რგოლი, მეპურეები და ამას ეწირება ქართული მეხორბლეობა“, – განაცხადა ბენიაიძემ
