შპს „ფოთის ახალ საზღვაო ნავსადგური“ ფოთში ახალ ნავმისადგომს ააშენებს.
მთავრობის განკარგულებით, კომპანიას სიმბოლურ ფასად, 1-ლარად აღნაგობის უფლებით, 49 წლის ვადით გადაეცა ფოთში მდებარე 5 239 კვ/მ ზღვის ფსკერზე არსებული ტერიტორია. განკარგულების მიხედვით, კომპანიამ აღნიშნული 1 ლარი ერთი თვის ვადაში უნდა გადაიხადოს.
კომპანიამ ხელშეკრულების გაფორმებიდან 36 თვის ვადაში მის საკუთრებაში არსებულ 6 უძრავ ქონებაზე უნდა განახორციელოს ჰიდროტექნიკური და ხაზობრივი ნაგებობების მშენებლობა ან რეკონსტრუქცია, კონფიგურაციის ცვლილება და საჭიროების შემთხვევაში ექსპლუატაციაში მიღება. კომპანიამ აღნიშნულ პროექტში ინვესტიციის სახით არანაკლებ 5 მლნ აშშ დოლარი უნდა ჩადოს.
ხელშეკრულების თანახმად, იმ შემთხვევაში თუ „ფოთის ახალი საზღვაო ნავსადგური“ ყოველწლიურად უზრუნველყოფს გადაცემული უძრავი ქონების აღნაგობის საბაზრო ღირებულების გადახდას, აღნაგობის უფლების ვადა შესაძლოა, დამატებით 50 წელი გაგრძელდეს.
რაც შეეხება კომპანიას, შპს ფოთის ახალი საზღვაო ნავსადგური სამეწარმეო რეესტრში 2015 წელს არის რეგისტრირებული. მისი დირექტორი დავით ნადირაშვილია. კომპანიის წილების უდიდეს ნაწილს, 75%-ს შპს „პეის ჯორჯია“ ფლობს, ხოლო 25%-ს აშშ-ში დაფუძნებული კომპანია PACE INTERNATIONAL LLC.
თავის მხრივ შპს “პეის ჯორჯია“ რეგისტრირებულია 2000 წელს, მისი დირექტორი ირაკლი თათეიშვილია. რაც შეეხება წილებს, ასე გადანაწილდა:
- ლაურა ლარიონი – 38%
- ირაკლი თათეიშვილი – 10%
- თამაზ კაპანაძე – 4%
- ირაკლი კერვალიშვილი – 38%
- თეიმურაზ კერვალიშვილი – 10%
