პორტუგალია საიმიგრაციო კვოტის რეჟიმს აუქმებს და ახალი სამუშაო ვიზით უცხოელებს ქვეყანაში ექვსი თვით დარჩენის საშუალებას აძლევს. ამის შესახებ საგარეო და საპარლამენტო საქმეთა მინისტრმა, ანა კატარინა მენდესმა განაცხადა, რასაც Euractiv ავრცელებს.
მისი თქმით, ახალი ტიპის, კერძოდ სამუშაოს მოძიების ვიზა უსაფრთხო, მოწესრიგებული, რეგულარული მიგრაციის ხელშეწყობისა და მუშახელის დეფიციტის წინააღმდეგ საბრძოლველად შეიქმნა. ახალი ვიზა სამუშაოს მოსაძებნად ჩასულ უცხოელ მოქალაქეებს საშუალებას აძლევს, პორტუგალიაში 120 დღის ნაცვლად, კიდევ 60 დღე, ანუ მთლიანობაში, 180 დღის განმავლობაში დარჩნენ.
„მთავრობამ თავისი გადაწყვეტილებით დიდი ხნის ანაქრონიზმი აღმოფხვრა, რასაც სამუშაო ვიზების გაცემის კვოტირების რეჟიმი წარმოადგენდა,“ – აცხადებს ანა კატარინა მენდესი.
ახალ ზომებს მინისტრთა კაბინეტის მიერ დამტკიცებული კანონპროექტი შეიცავს, რომელიც ქვეყანაში უცხოელების შესვლის, ყოფნის, გასვლისა და გაძევების სამართლებრივი რეჟიმის ცვლილებებს შეეხება.
