ლარში გაცემული სესხების მოცულობა გაიზარდა, უცხოურ ვალუტაში კი შემცირდა
კომერციული ბანკების მიერ გაცემული სესხების მოცულობა (ბანკთაშორისი სესხების გარდა), 2022 წლის ოქტომბერში, წინა თვესთან შედარებით 17.42 მლნ ლარით (0.04%-ით) გაიზარდა (გაცვლითი კურსის ეფექტის გარეშე, 0.55%-ით გაიზარდა) და მიმდინარე წლის პირველი ნოემბრისათვის 43.24 მლრდ ლარი შეადგინა-ეროვნული ბანკი
ამავე პერიოდში ეროვნული ვალუტით გაცემული სესხების მოცულობა 261.19 მლნ ლარით (1.11%-ით) გაიზარდა, ხოლო უცხოური ვალუტით გაცემული სესხების მოცულობა 243.77 მლნ ლარით (1.24%-ით) შემცირდა (გაცვლითი კურსის ეფექტის გარეშე, შემცირდა 0.12%-ით).
„რეზიდენტი იურიდიული პირებისათვის 2022 წლის ოქტომბრის ბოლოს, კომერციულ ბანკებს ეროვნული ვალუტით გაცემული ჰქონდათ 7.27 მლრდ ლარის (წინა თვესთან შედარებით 1.41%-ით მეტი), ხოლო უცხოური ვალუტით 12.07 მლრდ ლარის (წინა თვესთან შედარებით 1.56%-ით ნაკლები) მოცულობის სესხი (გაცვლითი კურსის ეფექტის გარეშე, 0.44%-ით ნაკლები).
მიმდინარე წლის ოქტომბრის განმავლობაში 0.38%-ით, ანუ 87.37 მლნ ლარით გაიზარდა რეზიდენტი შინამეურნეობების სექტორის დაკრედიტების მოცულობა და მიმდინარე წლის პირველი ნოემბრისათვის 23.07 მლრდ ლარი შეადგინა.მიმდინარე წლის პირველი ნოემბრისათვის, მთლიანი სესხების ლარიზაციის კოეფიციენტმა 55.17 პროცენტი შეადგინა, 2022 წლის პირველი ოქტომბრის მდგომარეობასთან შედარებით, გაიზარდა 0.58 პროცენტული პუნქტით (გაცვლითი კურსის ეფექტის გამორიცხვით, გაიზარდა 0.30 პროცენტული პუნქტით),“ – ნათქვამია სებ-ის ინფორმაციაში.
