59 წლის მილიარდერ ჯეფ ბეზოსის სუპერიახტა, Koru, კოდური სახელწოდებით Y721, ჩრდილოეთის ზღვაში გავიდა. 127 მეტრ სიგრძის სუპერიახტა 500 მლნ დოლარის ღირებულებისაა,Koru-ის ექსპლუატაცია წელიწადში, დაახლოებით, 25 მლნ დოლარი დაჯდება. გემს 40-კაციანი ეკიპაჟი ეყოლება და 18 სტუმრის მიღებას შეძლებს. იახტა ალუმინისგან და ფოლადისგან არის დამზადებული. მას სამი გემბანი აქვს, რომელთაგან ერთ-ერთზე საცურაო აუზი არის განთავსებული.
სუპერიახტის თანმხლები 75-მეტრიანი დამხმარე გემი იქნება, რომელზეც ვერტმფრენის მოედანი, მანქანები, ჰიდროციკლები, სწრაფი კატერები და ბეზოსის პირადი წყალქვეშა ნავიც კი განთავსდება.
გასულ წელს მილიარდერის ჯერ კიდევ დაუმთავრებელმა იახტამ წინააღმდეგობა მას შემდეგ გამოიწვია, რაც გავრცელდა ინფორმაცია, რომ ნიდერლანდების ხელისუფლებას ისტორიული კონინგსჰევენის ხიდის დემონტაჟი მოუწევდა, რადგან ხიდის 40-მეტრიანი ფოლადის კონსტრუქცია იახტის 70 მეტრ სიმაღლის საიალქნე ანძებს ვერ გაატერებდა. მილიარდერის იახტა ნიდერლანდების ალბლასერდამში მდებარე გემთმშენებელ ვერფ Oceanco-ზე შენდებოდა, ხოლო თავდაპირველი ვარიანტით, ის ოკეანეში შესასველელად როტერდამში უნდა ჩასულიყო და კონინგსჰევენის ხიდის ქვეშ გაევლო. ამ მიზნით 1927 წელს აშენებული ხიდის ცენტრალური ნაწილის დემონტაჟი იგეგმებოდა. თუმცა საბოლოოდ იახტის ბუქსირება ანძების გარეშე გადაწყდა და მან გრძელი მარშრუტი გაიარა, რომ როტერდამის ცენტრისთვის და კონინგსჰევენის ხიდისთვის გვერდი აევლო.
