„მწვანე სკოლის“ შენობა 11,000 კვ.მ. გამწვანებულ ტერიტორიაზეა განთავსებული,კამპუსში მოსწავლეების მიღება ბაღის ასაკიდან მე-12 კლასის ჩათვლით უკვე დაწყებულია. სკოლა სასწავლო პროცესს 2023 წლის სექტემბერში დაიწყებს.
ახალ კამპუსში მიმდინარეობს მასშტაბური სარემონტო სამუშაოები, რომელთა შედეგად სკოლა აღიჭურვება თანამედროვე სტანდარტების საკლასო ოთახებით, გარე სივრცეებით, საცურაო აუზით, ლაბორატორიებით, კომპიუტერული ოთახით, ბიბლიოთეკით, ღია და დახურული სპორტული მოედნებით.
დღეის მდგომარეობით „მწვანე სკოლა“ თბილისში წარმოდგენილია 4 კამპუსით: საბურთალოზე, დიღომში, დიდ დიღომსა და ნაძალადევში. სკოლა უახლოეს მომავალში კიდევ 4 ახალი კამპუსის გახსნას გეგმავს. საბურთალოს კამპუსის დამატების შემდეგ “მწვანე სკოლის“ ოთხივე ფილიალი ჯამურად 5,000-მდე მოსწავლის მიღებას შეძლებს.
„სასიხარულოა, რომ ვაგრძელებთ განვითარებას და მიზნების სისრულეში მოყვანას. დასახული გვაქვს მომავალი განვითარების გეგმა, რომლის მიხედვითაც გვინდა მაღალი ხარისხის განათლება, უსაფრთხო გარემო და საუკეთესო სასკოლო ინფრასტრუქტურა კიდევ უფრო მეტად ხელმისაწვდომი გავხადოთ საქართველოში.
გვჯერა, რომ აღნიშნული გაფართოება წარმატების მომტანი იქნება როგორც „მწვანე სკოლისთვის“, ასევე, ქვეყნის საგანმანათლებლო სექტორისთვის“ – ბაკურ სულაკაური, „მწვანე სკოლის“ დირექტორი და დამფუძნებელი
