კომპანია „სანდომის“ მარკეტინგის ხელმძღვანელის, თეკლა თალაკვაძის თქმით “ტკბილეულის მწარმოებელი კომპანია „სანდომის“ პროდუქციაზე ფასის ზრდა ნედლეულის გაძირებამ გამოიწვია. ინფლაცია საკონდიტრო ნაწარმზეც აისახა და ადგილობრივ ბაზარზე ტკბილეულის ღირებულება 8%-ით გაძვირდა”
“ინფლაცია საკონდიტრო ნაწარმზე უკვე აისახა. როდესაც ნედლეული ძვირდება, ჩვენც იძულებული ვართ გარკვეულწილად ფასები გავზარდოთ პროდუქციაზე. მიუხედავად იმისა, რომ ომის დაწყებისას, პირველ ეტაპზე, საკმაოდ დიდხანს შევინარჩუნეთ ძველი ფასი, ეს არსებული ნედლეულის მარაგების ხარჯზე მოვახერხეთ, თუმცა საბოლოოდ მაინც მოგვიწია დაახლოებით 8%-იანი ზრდა პროდუქტებზე”, – განაცხადა თეკლა თალაკვაძე.
მისივე თქმით, ბოლო პერიოდში იმპორტირებული პროდუქცია შემცირდა, თუმცა ადგილობრივ საწარმოებს კონკურენციის გაწევა მაინც უჭირთ.
“ბაზარი იმპორტირებული საქონლით არის გაჯერებული, მიუხედავად იმისა, რომ გარკვეულწილად იმპორტი შემცირდა, გვიჭირს კონკურენციის გაწევა. მიზეზი ისაა, რომ ქართულ პროდუქტს მეტი პოპულარიზაცია სჭირდება, ასევე დახლებზე ყოველთვის პრიორიტეტული იმპორტირებული საქონელია, რაც გაყიდვებზეც აისახება. იმპორტირებული საქონელი ყოველთვის არ ნიშნავს ხარისხიანს, ბაზარზე გვხვდება როგორც მაღალი ხარისხის, ასევე უხარისხო პროდუქტიც, რომლის ფასიც საკმაოდ დაბალია, ამიტომ ძალიან გვიჭირს კონკურენციის გაწევა მათთან“, – აღნიშნა თეკლა თალაკვაძემ
