TUREBI.GE-ს დამფუძნებელის ნიკა გოგოლაძის განცხადებით 2023 წლის ტურისტული მიმართულებით მოთხოვნა განსაკუთრებით ნაპოლში მოგზაურობაზე გაიზარდა. პოსტპანდემიურ პერიოდში მოთხოვნის გაზრდასთან ერთად ფასები ყველა მიმართულებით გაიზარდა.
„როგორც წესი, საშუალოდ ერთ კვირიანი დასვენებები იგეგმება ხოლმე. პანდემიის შემდეგ მოგზაურობაზე მოთხოვნის გაზრდისა და ინფლაციის გამო ფასები ყველა მიმართულებით გაზრდილია. ერთ ადამიანზე ერთ კვირიანი ტური, რომელშიც შედის ორმხრივი ავიაბილეთები, შიდა ტრანსფერი, სასტუმრო და სამოგზაურო დაზღვევა, ეგვიპტეში 1800-ლარიდან იწყება, თურქეთში ამ ეტაპზე 1500-ლარიდან, თუმცა ზაფხულში 2000 ლარზე მეტადაც გაიზრდება, საზღვაო კურორტებზე, მაგალითად, ესპანეთის მიმართულებით კი 1500-2500 ლარის ფარგლებშია.
ზამთრის პერიოდში ყველაზე აქტუალური საზღვაო კურორტებია – ეგვიპტე, დუბაი. განსაკუთრებით მას შემდეგ, რაც დუბაის მიმართულებით პირდაპირი ფრენები და უვიზო მიმოსვლა დაიწყო, რამაც დუბაიში ვიზიტი გააიაფა.ასევე ყოველთვის მაღალია მოთხოვნა თურქეთის მიმართულებებზე და, რა თქმა უნდა, პარიზზე. ასევე მოთხოვნადია იტალიის კომბინირებული ტურები, ერთად იგეგმება რამდენიმე ქალაქი: რომი, ვენეცია, ფლორენცია, მილანი და განსაკუთრებული ახალი ლოკაცია – ნაპოლი, რადგან ახალგაზრდა ვარსკვლავმა, ხვიჩა კვარაცხელიამ, ხალხს ფეხბურთთან ერთად მოგზაურობაც შეაყვარა“ – აცხადებს ნიკა გოგოლაძე.
2022 წელს საქართველოს ტერიტორიიდან საქართველოს რეზიდენტი მოგზაურების 2.2 მილიონი გასვლა დაფიქსირდა საზღვარგარეთ, რაც 3,7-ჯერ მეტია 2021 წლის ანალოგიურ მაჩვენებელზე. ასევე, საქართველოს რეზიდენტი ვიზიტორების მიერ საზღვარგარეთ განხორციელდა 944.2 ათასი ტურისტული ტიპის ვიზიტი, რაც 99.4 %-ით მეტია წინა წლის ანალოგიურ მაჩვენებელზე.
