ფინეთში სკოლის მოსწავლეებს საგანმანათლებლო დაწესებულებებში სმარტფონების გამოყენება შესაძლოა, აეკრძალოთ. ოფიციალური პირების თქმით, ეს ბავშვებს სასწავლო პროცესზე კონცენტრირებასა და სკოლაში უკეთესი შედეგების ჩვენებაში დაეხმარება. ინფორმაციას ამის შესახებ „ევროპულსი“ ავრცელებს.
ამჟამად საკანონმდებლო დონეზე მსგავსი აკრძალვის შემოღების საკითხს ქვეყნის მთავრობა განიხილავს. 2021 წელს ფინეთმა მიზნად დაისახა, რომ 2030 წლისთვის წიგნიერების მხრივ მსოფლიოს ლიდერი ქვეყანა გახდეს, რისთვისაც მთავრობამ წიგნიერების გამავრცელებელი ეროვნული სააგენტო შექმნა. სააგენტო საკონსულტაციო ცენტრების, საგანმანათლებლო დაწესებულებებისა და ბიბლიოთეკების მეშვეობით მოქალაქეებს წერა-კითხვის სწავლის თანაბარი ხელმისაწვდომობის უზრუნველყოფაში ეხმარება.
საერთაშორისო ტესტირების, PISA-ს შედეგების მიხედვით, ფინელმა მოსწავლეებმა 2006 წელს მათემატიკაში, ბუნებრივ მეცნიერებასა და კითხვაში მსოფლიოში საუკეთესო შედეგები აჩვენეს. თუმცა მას შემდეგ ფინეთმა რეიტინგში წამყვანი პოზიცია დაკარგა. მაგალითად, UNESCO-ს წიგნიერების მსოფლიო რეიტინგში ფინეთმა 2021 წელს 31-ე ადგილი დაიკავა (ლიდერად ვატიკანი დასახელდა). მთავრობა თვლის, რომ ეს ნაწილობრივ კლასში სმარტფონების გავრცელებით არის განპირობებული. ამ მოსაზრებას, ოფიციალურის პირების გარდა, მოქალაქეებიც იზიარებენ. მიმდინარე წლის მარტის ბოლოს მოქალაქეთა საინიციატივო ჯგუფი სკოლებში მობილური ტელეფონების აკრძალვის წინადადებით გამოვიდა. ინიციატივამ უკვე 30 000-ზე მეტი ხელმოწერა შეაგროვა.
