არგენტინის რესპუბლიკის ცენტრალური ბანკი განიხილავს ვარიანტებს, თუ რა სახით დაატანოს ეროვნული ვალუტის ბანკნოტებზე საფეხბურთო ნაკრების კაპიტნის, ლიონელ მესის გამოსახულება.მანამდე არგენტინის ცენტრალურმა ბანკმა რამდენიმე მოვლენას სამახსოვრო მონეტები მიუძღვნა, როგორიც არის 1978 წელს საფეხბურთო ნაკრების მიერ პირველი მსოფლიო თასის მოგება, სახელმწიფოებრიობის 200 წლისთავი და არგენტინის პირველი ლედის, ევა პერონის გარდაცვალების 50 წლის იუბილე. ინფორმაციას El Financiero ავრცელებს.
არგენტინის ბანკის წინადადებით, მესის გამოსახლება 1000 პესოს კუპიურზე უნდა დაიბეჭდოს, რაც უკავშირდება იმას, რომ ამ ბანკნოტების ნომინალი მესის საფეხბურთო მაისურის ნომერ 10-ით იწყება. უკანა მხარეს იგეგმება წარწერა „La Scaloneta“-ის დატანება, რაც არგენტინის ნაკრების მწვრთნელის, ლიონელ სკალონის მეტსახელია.
ამ გზით არგენტინაში სურთ, „უკვდავყონ“ ეროვნული ნაკრების გამარჯვება 2022 წლის მსოფლიო საფეხბურთო ჩემპიონატზე, რომელიც კატარში გაიმართა.
18 დეკემბერს არგენტინამ მსოფლიო ჩემპიონატის ფინალში საფრანგეთის ნაკრები დაამარცხა, რაც ამ ქვეყნის ნაკრებისთვის მსოფლიო ჩემპიონატის ისტორიაში მესამე გამარჯვებაა. მანამდე არგენტინელებმა მსოფლიო თასი 1978 და 1986 წლებში აიღეს.
