პოპულარულმა ქართველმა იუთუბერმა გიორგი მახარაშვილმა ანუ საეჭვო კაცმა ახალი პროდუქტი – საეჭვო ყუთი სულ ცოტა ხნის წინ დააანონსა. მახარას Youtube არხი უკვე თითქმის ორი წელია, არსებობს და 200 000-მდე გამომწერსაც ითვლის. საეჭვო კაცის პროდიუსერი აჩი ცენტერაძე ყუთს „დიდების ქინდერ სიურპრიზს“ უწოდებს და მიიჩნევს, რომ მისი სახით ქართულ სივრცეში ძალიან საინტერესო ახალი პროდუქტი გამოჩნდა.
რა იმალება საეჭვო ყუთში?
თითოეულ სასაჩუქრე ყუთში მინიმუმ ოთხი ან მეტი საჩუქარი მაინც იქნება მოთავსებული. მათი მომწოდებელი კი ამჟამად საეჭვო კაცის 8 მეგობარი კომპანიაა, რომლებთანაც იგი აქტიურად თანამშრომლობს. საეჭვო ყუთებისთვის ახალი პარტნიორი კომპანიების ძიება დღესაც გრძელდება და ნებისმიერ მსურველს შეუძლია საეჭვო კაცის გადაცემაში, რეკლამის სანაცვლოდ, საკუთარი პროდუქცია განათავსოს ყუთში.
საეჭვო ყუთის მთავარ პრიზებს ვოიაჟერის საგზურები და კრიპტოვალუტები, კერძოდ, ბიტკოინები წარმოადგენს. აღსანიშნავია ისიც, რომ პროდუქტზე მოთხოვნა უკვე საკმაოდ მაღალია. ამის გამო საეჭვო კაცის გუნდმა გადაწყვიტა, საგზურების რაოდენობა დაანონსებული ერთიდან ხუთამდე გაეზარდა.
ვისთვის არის განკუთვნილი საეჭვო ყუთი?
აბსოლუტურად ყველასთვის. არც იმას აქვს მნიშვნელობა, მისი მიმღები საეჭვო კაცის მაყურებელია ან მასზე რაიმე წარმოდგენა აქვს თუ არა. მთავარია, მას სიურპრიზები იზიდავდეს. გასათვალისწინებელია, რომ ყუთში მოთავსებული საჩუქრები ზრდასრულებისთვისაა. ამაზე ყუთის მყიდველთა წლოვანებაც მეტყველებს, რომელიც ჯერჯერობით 19-დან 50-მდე შუალედში მერყეობს.
რა მიზანი აქვს საეჭვო ყუთს?
ყუთი რამე განსაკუთრებულ დატვირთვას არ ატარებს. მიუხედავად იმისა, რომ საახალწლო პერიოდში გამოდის, ამ თემატიკით სულაც არ შემოისაზღვრება. ყუთის ჩუქება, როგორც სადღესასწაულო პერიოდში, ისე ნებისმიერ სხვა დროსაც თავისუფლად შეიძლება. მიუხედავად საერთო ბრენდისა, შეგვიძლია ვთქვათ, რომ საეჭვო ყუთი, Youtube არხისაგან დამოუკიდებელი პროდუქტია. რიგითი მყიდველისთვის კი, რომელმაც არ იცის, ძვირფას ადამიანს რა აჩუქოს, მშვენიერი არჩევანია.
