„ტაქსუნა“ – ტაქსის გამოძახების პირველი სერვისი რაჭაში

ტაქსის გამოძახების პირველი სერვისი მალე რაჭაშიც გამოჩნდება. სტარტაპ კომპანიის სახელწოდება „ტაქსუნა“ იქნება, რომელიც მგზავრებს რაჭის რეგიონის გარდა, თბილისი-რაჭისა და რუსთავი-რაჭის მიმართულებითაც მოემსახურება.

„ტაქსუნა“-ს დამფუძნებლების, ანი ჩუბინიძისა და ზუკა ნატმელაძის, განმარტებით, ამ ეტაპზე, რაჭის რამდენიმე სოფელში – ნიკორწმინდაში, ჭრებალოში, ონსა და უწერაში – სულ 20 მძღოლი ჰყავთ, თუმცა კადრების ძიების პროცესში არიან, რაც კომპანიის გაფართოებას ისახავს მიზნად. ვაკანსიის შესახებ დეტალური ინფორმაცია გამოქვეყნდა კომპანიის Facebook გვერდზეც.

კომპანიაში აღნიშნავენ, რომ რეგიონში დღესაც არსებობენ ტაქსის მძღოლები, თუმცა მათთან დაკავშირების პრობლემა დიდ სირთულეს წარმოადგენს, რამაც აიძულა სტარტაპერები, შეექმნათ კომფორტული გადაადგილების სერვისი. ჩაშვების პროცესი მრავალი ფაქტორის გამო გადავადდა, რომელთა შორისაც ქვეყანაში არსებული რთული ეკონომიკური ვითარება, ოპერირებისათვის საჭირო მანქანების მწირი არჩევანი და საწვავის გაზრდილი ფასი იყო.

ამასთანავე, დამფუძნებლები აცხადებენ, რომ, ფინანსური მოგების კუთხით, მათ არანაირი სარგებელი არ ექნებათ, თუმცა სურთ, სერვისი რეგიონში განვითარდეს, რითაც, თავის მხრივ, ხელი შეეწყობა ადგილობრივ მოსახლეობას, ლოკალურ ბიზნესს, კაფეებსა და სასტუმროებს.