პარკინგზე ყველაზე მაღალი ფასი საბურთალოზე გამოვიდა, რასაც ძირითადად KING DAVID-ის პროექტი განაპირობებს და ის ერთგვარ “ექსტრიმს“ წარმოადგენს ჯგუფში.თბილისში საპარკინგე ადგილების საშუალო ფასი 6 148 აშშ დოლარს შეადგენს – ინფორმაცია ეროვნული ბანკის მიერ გამოქვეყნებულ უძრავი ქონების დეველოპმენტის სექტორის კვლევაშია აღნიშნული.
„თბილისის ერთი კორპუსი საპარკინგე ადგილების საშუალო მოცულობით ბევრად აღემატება ნებისმიერი სხვა ქალაქისას. კერძოდ ერთ ბინაზე დაანგარიშებული პარკინგების რაოდენობით თბილისი 3-ჯერ აღემატება ბათუმს, სადაც პარკინგების გათვალისწინება ფაქტობრივად, არ ხდება (დეფიციტია). დედაქალაქის ცენტრალურ უბნებში ფიქსირდება პარკინგების ყველაზე მეტი რაოდენობა ერთ ბინაზე დაანგარიშებით.
თბილისის უბნების რიგითობა საპირისპიროა თუ პარკინგისა და ბინის ფასებს (1კვ.მ-ზე) შევადარებთ (შევაფარდებთ) ერთმანეთს. გარეუბანსა და ცენტრს შორის ფასები საცხოვრებელ ფართებზე უფრო მეტად განსხვავდება, ვიდრე საპარკინგე ადგილებზე,“- აღნიშნულია კვლევაში.
2022 წლის დასაწყისში თბილისის სხვადასხვა უბანში საპარკინგე ადგილების ფასი:
- თბილისი (საშუალო) – 6 148 აშშ დოლარი;
- საბურთალო – 7 486 აშშ დოლარი;
- კრწანისი – 6 003 აშშ დოლარი;
- ვაკე – 5 042 აშშ დოლარი;
- დიდუბე-ნაძალდევი – 4 726 აშშ დოლარი;
- ისანი-სამგორი-ვარკეთილი – 3 834 აშშ დოლარი;
- დიდი დიღომი – 3 585 აშშ დოლარი;
- გლდანი-მუხიანი – 3 527 აშშ დოლარი;
- ბაგები – 3 491 აშშ დოლარი;
- ლისი – 3 303 აშშ დოლარი.
