საქართველოში მაღალანაზღაურებად პირთა რაოდენობა გაიზარდა. ივნისში თვიურად 100 000 ლარზე მეტი შემოსავალი 697 პირმა მიიღო. მათი ჯამური შემოსავალი 252,131,978 ლარი იყო.
გასული წლის ივნისში კი 100 ათას ლარზე მეტი თვიური შემოსავალი 538 პირს ჰქონდა მიღებული, რაც იმას ნიშნავს, რომ მაღალანაზღაურებად პირთა რაოდენობა 29.5%-ით არის გაზრდილი.
ხელფასის სახით 100 000 ლარი და მეტი შემოსავალი 189 პირს ჩაერიცხა – ჯამში 73 132 292 ლარი. შემოსავლის სხვა სახეებია: დივიდენდი, პროცენტი, მოგება, როიალტი და სხვა. შარშან ივნისში ხელფასის სახით ამ მოცულობის შემოსავალი 153 პირს ჰქონდა.
100 ათას ლარზე მეტი შემოსავლის მქონე პირები წლების მიხედვით:
2022 წელი – 697 პირი / 252.13 მლნ ლარი
2021 წელი – 538 პირი / 227.64 მლნ ლარი
2020 წელი – 420 პირი / 237.15 მლნ ლარი
2019 წელი – 390 პირი / 133.38 მლნ ლარი
2022 წლის ივნისში საქართველოში ხელფასის სახით ანაზღაურება 902,000-მა ადამიანმა აიღო, რაც წინა წელთან შედარებით 31,000 დასაქმებულით, ანუ 3%-ით მეტია. ამ მოქალაქეებზე გაცემულმა ჯამურმა ანაზღაურებამ ივნისში 1.65 მილიარდი ლარი შეადგინა, შესაბამისად საშუალო ხელფასი 1,837 ლარი იყო, რაც 20%-იანი საშემოსავლო გადასახადის პირობებში ხელზე 1,469 ლარს ნიშნავს.
დასაქმებულთა ნახევარზე მეტს – 465 ათას პირს 1,200 ლარზე დაბალი ხელფასი აქვს, რაც “ხელზე აღებულ” 1,000 ლარზე ნაკლებ შემოსავალს ნიშნავს. 1,200 ლარზე მაღალი ხელფასი კი 437 ათას ადამიანს აქვს, მათ შორის 6,000 ლარზე მაღალი ანაზღაურება 33,300 ადამიანს აქვს, რაც საქართველოს მოსახლეობის 1%, ხოლო დასაქმებულთა მთლიანი რაოდენობის 4%-ია.
