ინოვაციური ტექნოლოგიების კომპანია Elven Technologies-ი 2019 წლის გაზაფხულიდან მეხანძრის ცეცხლგამძლე უნიფორმის შექმნაზე მუშაობს, რომელიც აღჭურვილია შიდა გაგრილების სისტემით და მსოფლიოში ანალოგი არ აქვს. ქართული ხელწერით წარმოებული უნიფორმის ავტორები ირწმუნებიან, რომ მათ მიერ შექმნილი კოსტიუმი მეხანძრეს დაცულობის მაღალ გარანტიას აძლევს.
კომპანიამ 2020 წლის ბოლოს 50 000 დოლარის დაფინანსება ერთ–ერთი ინვესტორისგან, ამერიკული ვენჩურული სტუდიო TECHNOVATE–ისგან მიიღო, რომელიც აზერბაიჯანელი ინვესტორის ფარიდ ისმაილზადას დაფუძნებულია და ამ ეტაპზე 5 სტარტაპს აფინანსებს. მათ რიცხვშია ქართული ცეცხლგაუმტარი უნიფორმების შემქმნელი კომპანია ELVEN TECHNOLOGIES.
როგორც კომპანიის დამფუძნებელი ვამეხ ხერხეულიძე განმარტავს, პროდუქტის შექმნა დასრულებულია. მისი თქმით, უკვე არსებობს ტექნოლოგია, რომლის მიხედვითაც მეხანძრეების დაცულობის ხარისხი მუშაობის დროს იზრდება. ბრენდის ხელმძღვანელი, ასევე, აცხადებს, რომ ამ ეტაპზე წარმოების მეთოდის კომერციალიზაციაზე მიმდინარეობს მუშაობა. პროდუქტის გათვლა ამერიკის ბაზარზე გასვლაა.
ცნობისთვის, ქართველი სტარტაპერების მიერ შექმნილი ქართული ინოვაციური პროდუქტი ცეცხლს 5-ჯერ უფრო კარგად უძლებს, ვიდრეს ის უნიფორმა, რომელიც ამ დროისთვის ქართველ და არამარტო ქართველ მეხანძრეებს აცვიათ. ამასთან, უფრო ზუსტად, თუ სტანდარტულ უნიფორმაში გამოწყობილი მეხანძრე 8-10 წამში დაიწვება, Elven Technologies უნიფრომა ამავე მასშტაბის ცეცხლს 40-50 წამის განმავლობაში გაუძლებს, რაც მნიშვნელოვანი წინგადადგმული ნაბიჯია უსაფრთხოების თვალსაზრისით.
