ასული 24 საათი ზოგადი საფონდო ინდექსებისთვის არაერთგვაროვანი შედეგებით დასრულდა: Dow Jones უმნიშვნელოდ, 0.15%-ით გაიზარდა; S&P 500-ის ღირებულება 0.81%-ით შემცირდა; ხოლო Nasdaq-ის ტექნოლოგიური ინდექსი 2.35%-ით არის შემცირებული.
ტექნოლოგიური სექტორის ვარდნა სოციალური პლატფორმების იმედგამაცრუებელ შედეგებს უკავშირდება. ერთ დღეში Snapchat-ის აქციების ღირებულება 43%-ით შემცირდა, რაც ნეგატიური სამომავლო მოლოდინებითაა განპირობებული.
სოციალური ქსელის წარმომადგენლობის განმარტებით, მაკროეკონომიკური ფაქტორების გაუარესებისა და რეცესიის რისკების ზრდის ფონზე, სულ უფრო მეტად მცირდება სარეკლამო სერვისებზე მოთხოვნა, რაც Snapchat-ის შემოსავლის ძირითად წყაროს წარმოადგენს.
ინვესტორები მხოლოდ Snapchat-ის აქციების გაყიდვით არ შემოფარგლულან, დაღმასვლის ტრენდი მალევე გავრცელდა სოცქსელებისა და სარეკლამო სექტორში წარმოდგენილ უმსხვილეს კომპანიებზეც: Facebook-ისა და Instagram-ის მფლობელი კომპანია Meta-ს ღირებულება თითქმის 9%-ით შემცირდა; ხოლო Google-ის მშობელი Alphabet-ის აქციების ფასი, დაახლოებით, 8%-ით დაეცა.
რაც შეეხება ბირჟაზე დაფიქსირებულ აღმასვლის ტენდენციას, შესანიშნავი კვარტალური შედეგების გასაჯაროებს ფონზე, 5.8%-ით გაიზარდა ავტომობილების სათადარიგო ნაწილების სავაჭრო ქსელის, Autozone-ის აქციების ღირებულება; ხოლო O’Reilly Automotive-ის საბაზრო კაპიტალიზაცია 5.0%-ით არის გაზრდილი.
ტექნოლოგიური სექტორის დაღმასვლის მიუხედავად, 5.6%-ით მოიმატა ვიდეო-კონფერენციების პოპულარული პლატფორმის, Zoom-ის აქციების ფასმა.
ხოლო რაც შეეხება Dow Jones-ის ინდექსს, გასულ 24 საათში გამორჩეული შედეგები ჰქონდათ შემდეგ უმსხვილეს ამერიკულ კომპანიებს: McDonald’s (+2.7%); Verizon (+2.0%); IBM (+2.0%); Coca-Cola (+1.9%); P&G (+1.8%); JPMorgan (+1.4%); Walmart (+1.3%).
