პურის მწარმოებელთა ასოციაციის ხელმძღვანელი, მალხაზ დოლიძე აცხადებს, რომ მომხმარებელმა უნდა იცოდეს, რაც ეტიკეტზე დატანილია, ნამდვილია.
„2023 წლის მეორე ნახევრიდან საქართველოში დაინერგება სისტემა, რომელიც გაამკაცრებს საკვები პროდუქტების, მათ შორის პურის დამზადებას. მართალია, პური რისკჯგუფს არ მიეკუთვნება, „ჰასპი“ კი ითვალისწინებს რისკის ადგილებში მათ მინიმიზაციას, პური კი 220 გრადუსზე ცხვება და არ არის რისკის ჯგუფში.
მიუხედავად ამისა, რეგულაცია გვეხება ჩვენს. ცხადია, მოსაწესრიგებელია უამრავი რამ. ძალიან ბევრმა სუბიექტმა დაიწყო დარგში მუშაობა და არის ძალიან ბევრი შენიშვნა რეკლამიდან წარმოების სტრუქტურამდე. ელემენტარულად, საცხობში ხელსაბანი, საცერი, თბილი წყალი, განათება და ვენტილაცია რომ უნდა იყოს, არ უნდა სწავლება და ამის დრო ნამდვილად მოვიდა. დამთავრდა საუბარი დეფიციტსა და რაოდენობაზე. მომხმარებელმა უნდა იცოდეს, რომ რასაც იძენს, რაც ეტიკეტზე დატანილია, ნამდვილი“, – განაცხადა დოლიძემ.
სურსათის მწარმოებელ ყველა ბიზნესოპერატორს ეკისრება ვალდებულება, საფრთხის ანალიზისა და კრიტიკული საკონტროლო წერტილების სისტემა (HACCP) 2023 წლის 1-ელ ივნისამდე დანერგოს.
