Mineralgroup-ის მიერ წარმოებული წყალი ორიგინალური შეფუთვით გამოირჩევა და არა ტრადიციულად ბოთლის, არამედ ჭიქის სახითაა წარმოდგენილი.
კომპანიის დამფუძნებლისა და გენერალური დირექტორის, ზაურ ლაცაბიძის განაცხადებით, მსგავსი შეფუთვით ქართულ ბაზარზე წყალი ჯერ-ჯერობით წარმოდგენილი არ არის და ამიტომ მომხმარებლისთვის ეს საინტერესო სიახლე იქნება.
კომპანია Mineralgroup-მა „თიბისის“ პროგრამა „სტარაპერის“ მხარდაჭერითა და 500 000 ლარის ინვესტიციით, ბორჯომის ხეობაში საწარმო გახსნა, სადაც მინერალური წყლისა და ნატურალური წვენის წარმოების პროცესი მიმდინარეობს.
„იდეა რამდენიმე წლის წინ გაგვიჩნდა და მის განხორციელებაში “თიბისის” პროგრამა „სტარტაპერმა“ ძალიან დიდი როლი შეასრულა. ჩვენი საწარმო ბორჯომის ხეობაში, ცხრა მუხაში მდებარეობს, მისი წარმადობა დღეში 100 000 ჭიქაა. რაც შეეხება წყალს, ის 87 მეტრიანი ჭაბურღილიდან ამოგვაქვს, ტექნიკური ფილტრებით ვამუშავებთ და ამიტომ არანაირ ქიმიურ დანამატს არ შეიცავს. ვცდილობთ, სრულყოფილად შევინარჩუნოთ ის მინერალური და გემოვნური თვისებები, რაც მას აქვს. ქართულ ბაზარზე აპრილის შუა რიცხვებიდან ჩვენი წყალი უკვე რეალიზაციაში გავა“, – აცხადებს ზაურ ლაცაბიძე.
წვენების წარმოება ამ ეტაპზე ტექნიკური დამუშავების პროცესი მიმდინარეობს, კომპანიაში რამდენიმე ნიმუში უკვე შეიქმნა და მომავალ წელს საწარმო ამ მიმართულებითაც სრული დატვირთვით დაიწყებს მუშაობას.
„ჩვენი წვენები 100%-ით ნატურალურია და არანაირ შაქარსა და კონსერვანტებს არ შეიცავს. რაც შეეხება ფორმას, წვენიც ჭიქით იქნება წარმოდგენილი, ასევე გვინდა Bag in Box ფორმითაც გამოვუშვათ და თანდათან შუშის მიმართულებაც განვავითაროთ. ასევე ვმუშაობთ ახალ პროექტზე, რომელიც ხილის გადამამუშავებელი საწარმოს შექმნას გულისხმობს, რაც წაახალისებს ადგილობრივ მებაღეებს და ერთგვარი მოტივაციაც იქნება ჩვენი რაიონისთვის“, – აცხადებს ლაცაბიძე.
