თამაშ-თამაშით შექმნილი სტარტაპი დიდი მომავლით, – 36 წლის ბარბარე გალდავამ საკუთარი შვილების გასართობად შექმნილი კარავი ბიზნეს იდეად აქცია და ბავშვობა სხვა პატარებსაც გაუმრავალფეროვნა.
«კარაველას» ისტორია 2017 წლის ზაფხულიდან იწყება, როდესაც ბარბარემ შვილებისთვის ძველი ფარდებისგან და საბავშვო თეთრეულისგან კარავი ააწყო.
სახლში აწყობილ კარავს სოციალურ ქსელში დიდი გამოხმაურება და დადებითი შეფასებები მოჰყვა, რამაც კიდევ უფრო მეტი მოტივაცია მისცა ბარბარეს. პროფესიულ კოლეჯში ჩაბარებით კი კერვა კიდევ უფრო მაღალ დონეზე შეისწავლა და კარვებთან ერთად დაიწყო საქანელების, წინსაფრების, ჩანთების, ხალიჩებისა და საბავშვო საბნების კერვა. «კარაველა» არის პირველი ეკომეგობრული ქართული ბრენდი, რომელიც მსგავსი სახის პროდუქციას აწარმოებს.
ბავშვებისთვის საყვარელ ბრენდს სახელი «კარაველა» ბარბარეს მეუღლემ შეურჩია.
«კარაველას» პროდუქცია ორი ტიპის ქსოვილისგან შედგება : 100 % ბამბისაგან, რომელიც საბავშვრო თეთრეულისთვის გამოიყენება და ტილოსგან. კარავს კომპლექტში მოჰყვება 1 რბილი ლეიბი, 2 ბალიში და დროშები დეკორაციისთვის. კარავი მარტივად იშლება და ყველგან წაღებაა შესაძლებელი. სენსორული საქანელა მზადდება სტანდარტული და დინოზავრის ფორმით, რომლის ჩამოკიდებაც ყველგან არის შესაძლებელი, როგორც ოთახში, ისე აივანზე, ეზოში ან ტყეში ნებისმიერ ხეზე. ბავშვების სათამაშო სივრცეს სრულყოფილ სახეს აძლევს მანტიები და წინსაფრები, რომელიც მათი გემოვნებით იქმნება. «კარაველა» საბავშვო ოთახის დეტალებზეც მუშაობს. ქმნის წამოსაწოლ/წამოსაჯდომ ხალიჩებს, სადაც ბავშვები სათამაშოებს ალაგებენ.
