დაბალი მოთხოვნის გამო, Apple-მა iPhone 14-ის წარმოების ზრდის გეგმაზე უარი თქვა. Bloomberg-ის ინფორმაციით, Apple-ის მთავარმა კონტრაქტორმა კომპანიებმა – Foxconn-მა და TSMC-მ აღნიშნულ საკითხთან დაკავშირებით შეტყობინება უკვე მიიღეს.
ანალიტიკოსები iPhone 14-ზე მოთხოვნის ზრდას მოელოდნენ და სწორედ ამისთვის კომპანიამ წლიური წარმოების დამატებით 12 მილიონი ერთეულით გაზრდის გადაწყვეტილება მიიღო, თუმცა წინასწარი შეკვეთების სტატისტიკა იმაზე მიუთითებს, რომ Apple-ის ახალ ფლაგმანზე მოთხოვნა იმაზე გაცილებით უფრო დაბალია, ვიდრე ამას კომპანიის წარმომადგენლობა მოელოდა.
ექსპერტების შეფასებით, სმარტფონებზე დაბალი მოთხოვნა გლობალური მაკროეკონომიკური ვითარების გაუარესებითაა განპირობებული. მაღალი ინფლაციისა და სამომხმარებლო ხარჯების მკვეთრად ზრდის ფონზე, პოტენციურ მომხმარებელთა ნაწილი ახალი iPhone-ის შეძენისგან თავს იკავებს. გარდა ამისა, გასათვალისწინებელია რუსეთისა და უკრაინის მასშტაბით Apple-ის პროდუქციის რეალიზაციის შეზღუდვის საკითხიც, რაც, ბუნებრივია, ნეგატიურად აისახება გაყიდვებზე.
გარდა ამისა, ხაზგასასმელია ისიც, რომ ახალმა iPhone 14-მა ექსპერტების მხრიდან კრიტიკა დაიმსახურა, რადგან ის ტექნიკური მახასიათებლებით პრაქტიკულად არ განსხვავდება წინამორბედი iPhone 13-ისგან, რაზეც შეკვეთების დაბალი მაჩვენებელიც მიუთითებს.
მოცემული ფაქტორების გათვალისწინებით, მომდევნო ექვსი თვის განმავლობაში კომპანია 90 მილიონი ერთეული სმარტფონის წარმოებას გეგმავს.
