“ბაზისბანკმა”, შეღავათიანი აგრო კრედიტის და სახელმწიფო პროექტის „დანერგე მომავლის“ ფარგლებში, ყვარლის რაიონ სოფელ ბალღოჯიანში კაკლის ბაღების გასაშენებლად მნიშვნელოვანი ინვესტიცია განახორციელა.
პროექტის ჯამურმა ღირებულებამ 182,000 ლარი შეადგინა, აქედან “ბაზისბანკის” მიერ გაცემული ინვესტიციის მოცულობა 137,000 ლარია, ხოლო სხვაობა სახელმწიფო პროექტის „დანერგე მომავლის“ ფარგლებში დაფინანსდა.
პარტნიორობის ფარგლებში, კაკლის ბაღები 18 ჰექტარზე გაშენდა და სრულად მოეწყო წვეთოვანი სარწყავი სისტემა. ამჟამად კაკალი უკვე მოსავლიანია და 2023 წელს 50 ტონამდე მოსავალს მიიღებს, ხოლო მომდევნო წლებში წარმადობა ეტაპობრივად გაიზრდება. პირველ ეტაპზე, პროდუქციის რეალიზება სრულად ქართულ ბაზარზე მოხდება, ხოლო წარმადობის ზრდასთან ერთად, ასევე საზღვარგარეთის ბაზრებზე განხორციელდება. ბაღებში სრულად ადგილობრივი მოსახლეობაა დასაქმებული.
მნიშვნელოვანია ის ფაქტი, რომ ბაზისბანკსა და აგრო მეწარმეს შორის პარტნიორული თანამშრომლობა 2013 წლიდან დაიწყო. მეურნეობის გაფართოების მიზნით, თანამშრომლობის პერიოდში, ბაზისბანკის მიერ განხორციელებულმა ინვესტიციის მოცულობამ ჯამში 600,000 ლარამდე შეადგინა.
„ბაზისბანკთან” ჩვენი პარტნიორობა წლების წინ დაიწყო. ბანკის ფინანსური ჩართულობითა და შეღავათიანი აგროკრედიტის პროექტის ფარგლებში, 2013 წელს საფერავის ჯიშის ვენახები 4 ჰექტარზე გავაშენეთ. უკვე არსებულ ვენახებში დაფინანსდა ძირითადი საშუალებების შეძენა, განვაახლეთ არსებული ვენახები, შემოიღობა ბაღები და მოეწყო წვეთოვანი სისტემები, შევიძინეთ სოფლის მეურნეობის უახლესი ტექნიკა. ასევე მოვაწყეთ საოჯახო მარანი“, – აღნიშნა ინდ. მეწარმე გიორგი პაპუაშვილმა.
„მუდმივად ვავითარებთ თანაშრომლობას სოფლის მეურნეობის სფეროში დასაქმებულ პირებთან და კომპანიებთან, რითიც ხელს ვუწყობთ ფერმერული მეურნეობების განვითარებას და ვქმნით ახალ შესაძლებლობებს ბიზნესის წარმატებული საქმიანობისთვის. წარმატებებს ვუსურვებთ მეწარმეს და ვიმედოვნებთ, რომ ჩვენი პარტნიორობა მომავალში კიდევ უფრო გაფართოვდება და ახალ მასშტაბებს მიაღწევს. ყოველთვის მზად ვართ ფინანსური დახმარება გავუწიოთ სოფლის მეურნეობის სექტორს ყველა მიმართულებით“, – განაცხადა “ბაზისბანკის” კომერციულმა დირექტორმა გიორგი გაბუნიამ.
