საქართველოს ბანკის მხარდაჭერით ოზურგეთში 14 ჰა ფართობის მოცვის ბაღები გაშენდება

აგროსექტორის, სოფლის მეურნეობის სფეროსა და ადგილობრივი მეწარმეების ხელშეწყობის მიზნით, საქართველოს ბანკი ახალ მხარდამჭერ პროექტს იწყებს და გურიის რეგიონში, ოზურგეთის რაიონის დაბა ურეკში, 14 ჰექტარ ფართობზე მოცვის ბაღების გაშენებას გეგმავს. ინვესტიციის მოცულობა 1 320 000 ლარია.

პარტნიორობის ფარგლებში „ქართული მოცვის კომპანია“ წელიწადში 150-დან 170 ტონამდე მოცულობის ლურჯი მოცვის მოსავალს უზრუნველყოფს. პროდუქციის რეალიზაცია როგორც ადგილობრივ, ასევე საერთაშორისო ბაზარზე განხორციელდება. გარდა ამისა, პროექტი დასაქმების პროგრამასაც შეუწყობს ხელს. კერძოდ, მუდმივად დასაქმდება 15-დან 20-მდე ადგილობრივი, ხოლო სეზონურად მომუშავეთა რაოდენობა 60-მდე იქნება.

საქართველოს ბანკის კორპორაციული საბანკო მომსახურების დეპარტამენტის დირექტორის მოადგილე, სანდრო ძაგნიძე აღნიშნავს, რომ ბანკის ჩართულობა და მსგავს პროექტებში მონაწილეობა დიდად შეუწყობს ხელს საქართველოს საერთაშორისო პოზიციონირებას უცხოურ ბაზარზეც და, ასევე, ქვეყნის შიგნით აგროსექტორის განვითარებას. ძაგნიძის განმარტებით, ბანკი მომავალშიც აქტიურად განაგრძობს ადგილობრივი ბიზნესის მხარდაჭერას, რათა შეიქმნას მეტი სამუშაო ადგილი და გაძლიერდეს ქვეყნის ეკონომიკა.

აღსანიშნავია, რომ საქართველოს ბანკი უკვე წლებია, არაერთი პროექტის ორგანიზატორი და მონაწილეცაა. ინოვაციური მიდგომით, ქვეყნის ბაზრის ლიდერი კომერციული საფინანსო ინსტიტუტი ხელს უწყობს მცირე მეწარმეების ეკონომიკურად წელში გამართვას. განსაკუთრებულ ყურადღებას ბანკი სტარტაპ წამოწყებებს აქცევს და მათ მხარდაჭერას უზრუნველყოფს.