Tesla-ს და SpaceX-ის დამფუძნებლის და ხელმძღვანელის, ილონ მასკის განცხადებით, ხელოვნური ინტელექტის (AI) ახალი მოდელების შესაძლებლობები ადამიანის გონებას უკვე 2025 წლის ბოლოსთვის გადააჭარბებს.
„ვვარაუდობ, რომ, დაახლოებით, მომავალი წლის ბოლოს გვექნება AI, რომელიც ყველაზე ჭკვიან ადამიანზე უფრო ჭკვიანი იქნება,“ – ამბობს მასკი.
მასკის პროგნოზით, მომდევნო ხუთი წლის განმავლობაში, ეგრეთ წოდებული, ზოგადი ხელოვნური ინტელექტის (Artificial General Intelligence-AGI) შესაძლებლობები, რომელსაც ადამიანის დონეზე გონებრივი სამუშაოს შესრულება შეუძლია, ყველა ადამიანის შესაძლებლობებს გადააჭარბებს.
მასკის თქმით, ხელოვნური ინტელექტის მოდელების სწავლებას ამჟამად მოწინავე ჩიპების დეფიციტი უშლის ხელს. მაგალითად, თავად მასკის სტარტაპი, xAI-ი მოდელ Grok 2-ის ვერსიას ასწავლის, რომელიც, მილიარდერის აზრით, კომპანია OpenAI-ის GPT-4-ზე უკეთესი იქნება. Grok 2-ის დატრენინგებას Nvidia H100-ის 20,000 ჩიპი დასჭირდა, ხოლო უფრო მოწინავე Grok 3-ისთვის, დაახლოებით, 100,000 ჩიპი იქნება საჭირო.
მასკმა ხაზგასმით აღნიშნა, რომ მომდევნო ერთ ან ორ წელიწადში AI-ის განვითარებისთვის გადამწყვეტი ელექტრომომარაგება იქნება.
