ხის სახლებისა და კოტეჯების მწარმოებელი ქართული ბრენდი kohi.ge წარმოების გაფართოებასა და ევროკავშირის ქვეყნების ბაზარზე გასვლას გეგმავს. ახალი სავაჭრო სივრცის ათვისებამდე, კომპანიას არაერთი სირთულის გადალახვა მოუწია, რომელიც ძირითადად მსოფლიოში არსებულ პოლიტიკურ-ეკონომიკურ სიტუაციასა და უკრაინაში რუსეთის შეჭრასთან იყო დაკავშირებული.
აღსანიშნავია, რომ მიუხედავად გაყიდვების შემცირებისა, kohi.ge-ის პროდუქციაზე, კონკურენტებისაგან განსხვავებით, ფასები არ გაუზრდია, რადგან მასალის პრობლემა მოაგვარა, რუსული იმპორტისგან დამოუკიდებელი გახდა და თითქმის სრულად ქართულ წარმოებაზე გადავიდა.
ომისგან გამოწვეულმა კრიზისმა მკვეთრად გააძვირა პროდუქციის ღირებულება. მაღალმთიან ტყეში ჯერ მოუჭრელ ქართულ ხეზე ფასი საგრძნობლად არის გაზრდილი. თუ ადრე 1 კუბური მეტრი ღირდა 50 ლარი, ახლა მისი ფასი 190 ლარი გახდა. გარდა ამისა, საქართველოში ამ ბაზარს ბევრი რეგულაცია აქვს, თუ შესაბამისი ლიცენზია კომპანიას არ აქვს, ხე ვერც მოიჭრება და ვერც გადამუშავდება. Kohi.ge არ ჭრის ხეს ტყეში, არამედ მას ჰყავს პარტნიორი კომპანიები, რომლებიც აწვდიან ახალ მოჭრილ ფიცარს.
რაც შეეხება მოსაპირკეთებელ მასალას, მომწოდებელი ამ შემთხვევაშიც პარტნიორი კომპანიაა, რომელმაც ნატახტარში მოსაპირკეთებელი მასალის წარმოება დაიწყო, მათი ფასებიც რუსეთიდან იმპორტირებულზე გაცილებით ნაკლებია.
kohi.ge-ის განმარტებით, მათი სახლები, მალე ევროკავშირშიც გამოჩნდება, რომელსაც წარწერა „დამზადებულია საქართველოში“ ექნება, თუმცა ამ ეტაპზე რუსეთ-უკრაინის ომმა სახლების ევროპაში ექსპორტი შეაჩერა. „kohi.ge“ ბულგარეთში შვილობილ კომპანიასაც ფლობს, რომელიც სახლებს ევროპის ქვეყნებისთვის ამზადებს.
