ბაზარზე დაუნის სინდრომით Barbie-ის პირველი თოჯინა სათამაშო Barbie-ის მწარმოებელი ამერიკული კომპანია, Mattel-მა წარადგინა.ინფორმაციას The Guardian ავრცელებს.
კომპანიის განცხადებაში ნათქვამია, რომ Barbie დაუნის სინდრომით დაეხმარება „ბევრ ბავშვს, იპოვოს სათამაშო, რომელიც მას ჰგავს და წარმოადგენს,“ რომ ყველა ბავშვმა შეძლოს, „Barbie-ში საკუთარი თავი ამოიცნოს.“ ახალი თოჯინის შესაქმნელად Mattel აშშ-ის დაუნის სინდრომის ეროვნულ საზოგადოებასთან (NDSS) და სამედიცინო საზოგადოებასთან თანამშრომლობდა. ექსპერტებთან ერთად კომპანიამ წარადგინა სათამაშო, რომელიც დაუნის სინდრომის მქონე ქალების ფიზიკურ აღნაგობას გადმოსცემს.
თითოეული ასეთი Barbie ატარებს გულსაკიდს, რომელიც 21-ე ქრომოსომის სამი ასლის სიმბოლოა. სწორედ ეს თანდაყოლილი გენეტიკური ანომალია იწვევს დაუნის სინდრომის მქონე ადამიანებში 47-ე ქრომოსომას.
„ჩვენ გვჯერა, რომ ბარბის თოჯინები უნდა ასახავდეს იმას, რასაც გოგოები მათ გარშემო ყოველდღე ხედავენ. ეს მეტად მნიშვნელოვანია. თოჯინების ახალი ხაზი გოგონებს აჩვენებს, რომ მსოფლიოში სილამაზეზე განსხვავებული წარმოდგენები არსებობს და სილამაზის ერთი სტანდარტი არ არსებობს. რაც უფრო მრავალფეროვანია ჩვენი თოჯინები, მით უკეთესია. ამ გზით გოგონები და ზოგადად ბავშვები შეძლებენ საკუთარი თავის იდენტიფიცირებას მათთან,“ – აცხადებს კომპანიის ვიცეპრეზიდენტი, ლიზა მაკნაიტი.
Mattel-მა ინკლუზიური თოჯინების წარმოება 2020 წელს დაიწყო. გასული წლის მაისში კომპანიამ თავისი ინკლუზიური ხაზის, Fashionista-ს ფარგლებში დააანონსა პირველი Barbie თოჯინის გამოშვება სმენის აპარატით. სათამაშოს შემუშავებაში საგანმანათლებლო აუდიოლოგიის სპეციალისტმა, დოქტორ იან რიჩარდსონმა მიიღო მონაწილეობა.
