დღევანდელი სამყაროს განუყოფელი გაჯეტის, სმარტფონის არჩევა, მიუხედავად მრავალი ბრენდის არსებობისა, ბევრს მაინც უჭირს. ხშირად, მომხმარებლები მობილურ ტელეფონს სხვადასხვა კრიტერიუმით აფასებენ, როგორიცაა დიზაინი, ბატარეის სიმძლავრე, კამერის ხარისხი, სისწრაფე და ასე შემდეგ.
კომუნიკაციების ეროვნული კომისიის 2021 წლის საბოლოო ანგარიშის თანახმად, საქართველოში მობილური აბონენტების 39% უპირატესობას „სამსუნგის“ ტელეფონს ანიჭებს, რაც ამ ბრენდს, ქვეყნის მასშტაბით, ლიდერად აქცევს.
კომისია საქართველოში მობილური აპარატების პროცენტულ გადანაწილებასაც მიმოიხილავს.
კერძოდ, მათი ცნობით, საქართველოში ყველაზე პოპულარულია „სამსუნგის“ მობილური ტელეფონები. მე-2 ადგილზეა – Apple, რომლის აპარატებსაც მობილური აბონენტების – 15% ფლობს; მას მოსდევს Xiaomi, რომელსაც უპირატესობას მობილურ აბონენტთა 13% ანიჭებს, ხოლო 18% – სხვა ბრენდებზე ნაწილდება.
მათ შორის, HUAWEI-ს აპარატებს მობილური აბონენტების 7% ფლობს, Microsoft/Nokia-ს კი 5% ანიჭებს უპირატესობას. რაც შეეხება სხვა ბრენდებს, ანგარიშის თანახმად, აბონენტების შედარებით მცირე წილი მოდის.
აღსანიშნავია ისიც, რომ HUAWEI-ს ოპერაციული სისტემისათვის საერთაშორისოდ დაწესებული შეზღუდვების შემდეგ, ამ ბრენდის სმარტფონზე მოთხოვნა მნიშვნელოვნად შემცირდა, მათ შორის საქართველოშიც.
