ბავშვთა ხელოვნური კვების ფორმულა Similac აშშ-ში დეფიციტშია, მიზეზი ფორმულას მწარმოებელი ქარხანა Abbott-ის დროებითი დახურვაა. ინფორმაციას BBC ავრცელებს. გამოცემის ცნობით, ქარხანა, სადაც ბავშვთა ხელოვნური რძე მზადდება, თებერვალში შემოწმების დროს არასათანადო ჰიგიენურ პირობებში იყო, რამაც ხელოვნური რძის დაბინძურება გამოიწვია. შედეგად, ამერიკაში 2 ბავშვი მოიწამლა, ხოლო 2 – გარდაიცვალა.
ამერიკის დაავადებათა კონტროლის და დაცვის ცენტრში აცხადებენ, რომ ისინი იძიებენ შესაძლო კავშირს, თუმცა ჯერჯერობით ტესტირებამ დაადგინა, რომ ქარხანაში აღმოჩენილი ბაქტერიების შტამი დაავადებულ ჩვილებში აღმოჩენილს არ ემთხვევა. თავის მხრივ, კომპანია Abbott-ი ანტისანიტარული პირობების გამო FDA-მაც გააკრიტიკა.
ბოლო კვირების განმავლობაში ისეთ დიდ ქსელებში, როგორებიცაა CVS-ი და Walgreens-ი, მოქმედებს შეზღუდვა, რომლის მიხედვით მომხმარებელს ერთ ჯერზე მხოლოდ კონკრეტული რაოდენობის ქილის შეძენა შეუძლია, ეს რაოდენობა კი სხვადასხვაგვარად განისაზღვრება და დამოკიდებულია ბავშვის ასაკზე, წონასა და ჯანმრთელობის ზოგად მდგომარეობაზე.
ამ ეტაპზე ბავშვთა ხელოვნური კვების მარაგი მხოლოდ აშშ-ში იწურება. საგულისხმოა, რომ ტოპ ბრენდის ფორმულა Similac-ი საქართველოშიც დიდი პოპულარობით სარგებლობს. მისი შეძენა ქვეყანაში მოქმედ ნებისმიერ სააფთიაქო ქსელში ბავშვთა კვებისა და მოვლის საშუალებების ოფიციალური იმპორტიორის საქართველოში – „ჯეო ნუთრიშენის“ მეშვეობითაა შესაძლებელი. კომპანიაში აცხადებენ, რომ ამ ეტაპზე ქვეყანაში ფორმულას დეფიციტი არ არის და არც უსაფრთხოებასთან დაკავშირებით არსებობს რაიმე პრობლემა, რადგან Similac ევროპიდან შემოდის.
“ამერიკის ქარხნიდან Similac საქართველოში საერთოდ არ შემოდის, ამ დრომდე ფორმულა ჩვეულებრივ მოგვეწოდება. დეფიციტთან დაკავშირებით ჩვენს მომწოდებელს არანაირი ინფორმაცია არ გაუვრცელებია. ამიტომ ყველას შეუძლია მშვიდად იყოს. ჩვენ ევროპაში დამზადებულ Similac-ს ვიღებთ“, – განუცხადა BMG-ის „ჯეო ნუთრიშენის“ დირექტორმა თიკა გიორგობიანმა.
ცნობისთვის, კომპანია Abbott-ი საბავშვო ტოპ ბრენდის ფორმულა Similac-ს აწარმოებს და ის ხელოვნური საკვების მთავარი მიმწოდებელი კომპანიაა მრავალი სახელმწიფო პროგრამისთვის, მათ შორის დაბალი შემოსავლის მქონე ქალებისა და ბავშვებისთვის. მას შემდეგ კი, რაც პრობლემა გასაჯაროვდა და მშობლებმა საბავშვო ფორმულას მარაგების დაგროვება დაიწყეს, შტატებში Similac-ის დეფიციტია.
რაც შეეხება თავად Abbott-ს, ქარხნის ადმინისტრაციის განცხადებით, ისინი ხელახლა გახსნისთვის ემზადებიან და პრობლემის მოსაგვარებლად, შტატებში ირლანდიაში არსებული ქარხნიდან საკვების დამატებით მარაგს გზავნიან.
