სტატისტიკის ეროვნული ცენტრის ინფორმაციით, 2022 წლის 1-ლი იანვრის მდგომარეობით, საქართველოს მოსახლეობის რიცხოვნობამ 3 688.6 ათასი კაცი შეადგინა, რაც წინა წლის შესაბამისი პერიოდის მაჩვენებელთან შედარებით 1.1 პროცენტით ნაკლებია.
გასულ წელს, ემიგრანტების რიცხოვნობამ 99 974 კაცი შეადგინა, რაც წინა წელთან შედარებით 34.6 პროცენტით მეტია. აღსანიშნავია, რომ 2012 წლიდან მოყოლებული ეს ერთ-ერთი ყველაზე მაღალი ნიშნულია, ამაზე მეტმა – 105 107 ადამიანმა ქვეყანა 2019 წელს დატოვა.
2022 წლის 1-ლი იანვრის მდგომარეობით, კაცების რიცხოვნობამ 1 770 000 შეადგინა, ხოლო ქალების რიცხოვნობამ – 1 918 700. ამასთან, საქართველოს მოსახლეობის 48 პროცენტი კაცი, ხოლო 52 პროცენტი – ქალია. სქესთა რაოდენობრივი თანაფარდობის მაჩვენებელი 92-ს შეადგენს, რაც იმას ნიშნავს, რომ ყოველ 100 ქალზე 92 კაცი მოდის. აღსანიშნავია, რომ 30 წლამდე ასაკში კაცების რიცხოვნობა აღემატება ქალების რიცხოვნობას, ხოლო 30 წლის ასაკიდან სახეზე გვაქვს საპირისპირო სურათი, რაც გამოწვეულია კაცებთან შედარებით ქალების უფრო მაღალი სიცოცხლის მოსალოდნელი ხანგრძლივობით.
