კახეთში სამაცივრე მეურნეობა ამოქმედდა.
“საქართველოს ოქროს ხელი” – ასე ჰქვია მეურნეობას, რომელიც 1 080 კვადრატულ მეტრზე, 5 სამაცივრე ბოქსს აერთიანებს. საერთაშორისო სტანდარტების შესაბამის მეურნეობას 250 ტონა პროდუქტის შენახვის შესაძლებლობა აქვს.
“საქართველოს ოქროს ხელის” მენეჯერმა გადაცემა “საქმიანი დილას” ეთერში აღნიშნა, რომ აქამდე სოფელში ხილის რეალიზაცია ჭირდა, რადგან ფერმერებს პროდუქტი მალევე უფუჭდებოდათ, სამაცივრე მეურნეობამ კი მათ საშუალება მისცა სარეალიზაციოდ მეტი შესაძლებლობა ჰქონოდათ.
“სამაცივრე მეურნეობა უკვე ამოქმედდა. დავიწყეთ პირველი პროდუქტის – ატმის ჩაბარება და რეალიზაცია. შემდგომში უკვე სეზონის მიხედვით, სხვადასხვა ხილს ჩავიბარებთ. იგეგმება კენკროვანი კულტურების მიღება და რეალიზაციაც. რეგიონში სამაცივრე მეურნეობა ფერმერებისთვის დიდი ხელშეწყობაა. იქიდან გამომდინარე, რომ ხილი მალე ფუჭდება, ის რეალიზაციის შანსებს კარგავს, სამაცივრე მეურნეობის ხარჯზე კი,ხილი არ ზიანდება”, – აღნიშნავს ანდრო ჯოხაძე.
აღსანიშნავია, რომ “საქართველოს ოქროს ხელისთვის” $74 000 მოცულობის ინვესტიცია განხორციელდა. ანდრო ჯოხაძის განმარტებით, პროექტი USAID-ისა და “თიბისი სტარტაპერის” პროგრამის დახმარებით განხორციელდა.
“სამაცივრე მეურნეობა იდეალურად არის მოწყობილი. სრულიად შეესაბამება საერთაშორისო სტანდარტებს. ეს კი “თიბისი სტარტაპერის” პროგრამის დახმარებით შევძელით”, – ამბობს ის.
“საქართველოს ოქროს ხელის” მენეჯერი პროდუქტის გასაღების ბაზრებზეც საუბრობს.
“დიდი პერსპექტივაა ევროპის ბაზრებზე, თუმცა ყოფილი პოსტსაბჭოთა ქვეყნები ლიდერობენ. მომავალი წლიდან ვაპირებთ სხვადასხვა ქვეყანაში რეალიზატორები მოვიძიოთ და ექსპორტი საკუთარი ძალებით განვახორციელოთ”, – აღნიშნა ანდრო ჯოხაძემ.
