სამაცივრე საწარმოს ახალი გეგმები – „გლენბერი“ ახალი ობიექტის გახსნასა და საერთაშორისო ბაზარზე მეტი წარმატების მიღწევას გეგმავს

„გლენბერი“, რომელიც ქართული, გაყინული ხილ-ბოსტნეულის ექსპორტზე გატანას უზრუნველყოფს, საზოგადოების წინაშე ახალი გეგმების წინაშე წარსდგება და, დამფუძნებელთა განმარტებით, 15 მილიონი ლარის ინვესტიციით, დედაქალაქთან ახლოს ახალ საწარმოს მოაწყობს. როგორც ბრენდის ხელმძღვანელი, რაფაელ მაღალაშვილი განმარტავს, დაწყებულია თანამშრომლობა ერთ-ერთ უცხოურ კომპანიასთან, რომელიც ყოველთვიურად 60 კონტეინერ გაყინულ ბოსტნეულს შეისყიდის. კერძოდ, საერთო გათვლებით, წელიწადში უზრუნველყოფილი იქნება 10 000 ტონა გაყინულ კარტოფილის, 5 000 ტონა ხახვის, 2 000 ტონა ჭარხლისა და 1500 ტონა ნივრის, ასევე, სხვადასხვა სახის ხილის ქვეყნიდან გატანა. ამ ეტაპზე უცნობია, რომელ კონტრაქტორ საერთაშორისო ბრენდსა თუ ექსპორტიორ ქვეყანაზეა საუბარი, თუმცა ცნობილია მხოლოდ დაფინანსების წყაროები. მაღალაშვილის თქმით, ინვესტიციის ნაწილი პირად სახსრებს შეადგენს, ხოლო ნაწილს სახელმწიფოს გარანტიით ბანკებიდან იზიდავს. ამასთანავე, ის არ გამორიცხავს, საინვესტიციო მოცულობა 25 მილიონ ლარამდე გაიზარდოს.

ცნობილია ისიც, რომ ახალი საწარმოსათვის ტერიტორია უკვე შესყიდულია, სადაც, საწყის ეტაპზე, 100 ადამიანის დასაქმების შესაძლებლობა იქნება. ფაბრიკაში ფერმერების მიერ წარმოებული ხილ-ბოსტნეული გადამუშავდება, გაიყინება და საექსპორტოდ გამზადდება. ხაზგასასმელია, რომ „გლენბერი“ ფერმერთა საკუთრებაში არსებულ მიწებზე მოსაყვანი მოსავლის სასუქებისა და თესლის მომარაგებაზე პასუხისმგებლობას საკუთარ თავზე იღებს.

სამაცივრე საწარმო „გლენბერი“ ქართულ ბაზარზე უკვე რამდენიმე წელია, 2018 წლიდან ფუნქციონირებს. მეწარმეებმა შიდა ქართლის რეგიონის სოფელ ქვენატკოცნიდან შეძლეს, მთავრობის „ერთიანი აგროპროექტის“ ფარგლებში, 600 000 ლარამდე ოდენობის სახელმწიფო გრანტი მოეზიდათ. 2020 წლის ივნისში, ქართული მარწყვი და მოცვი შეერთებული შტატების ბაზარზე გავიდა. იმავე წელს, კომპანიის მფლობელებმა 5 ჰექტარზე ბროკოლის, ხოლო 11 ჰექტარზე მარწყვის პლანტაცია გააშენეს. „გლენბერი“-ს წარმატებულ მუშაობას ციფრებიც ასახავენ. საწარმო წელიწადში 1200 ტონა სხვადასხვა სახის ხილისა და ბოსტნეულის შენახვის, ხოლო 24 საათში, 10 ტონის გადამუშავების შესაძლებლობას იძლევა. სტატისტიკა უფრო წარმატებული იქნებოდა რომ არა ხონში, 32 მილიონი ლარის ოდენობის აგროკომპლექსის ჩავარდნა, რა დროსაც ხელისუფლებამ მიწების გადაცემაზე უარი თქვა, რადგან პროექტში კომპანიის პარტნიორი უცხოელი ინვესტორებიც უნდა ყოფილიყვნენ, მათზე მიწების გადაცემა კი, ქართული კანონმდებლობით აკრძალულია.