ეროვნული ბანკის პრეზიდენტის განცხადებით, საშუალო ინფლაცია სავარაუდოდ 9.5%, ხოლო წლიური ინფლაცია დაახლოებით 8.5% იქნება. თუმცა გვენეტაძის თქმით, იმის გამო, რომ პანდემია და რუსეთ-უკრაინის ომი ჯერ არ დასრულებულა, პროგნოზების გაკეთება მაინც რთულია.
“სამწუხაროდ, რუსეთის უკრაინაში შეჭრამ ის პრობლემები კვლავ უკან დააბრუნა, რომლებიც პანდემიამ მოიტანა. მოგეხსენებათ ეს არის მიწოდების ჯაჭვები, მაღალი ფასები გადაზიდვებზე. რუსეთი და უკრაინა სასაქონლო ბაზრებზე ისეთი პროდუქტების მნიშვნელოვან მიმწოდებლებს წარმოადგენენ, როგორიცაა, ხორბალი, მზესუმზირა და სასოფლო სამეურნეო პროდუქტები. ამან ინფლაციაზე დამატებითი წნეხი შექმნა. სურსათისა და სოფლის მეურნეობის საერთაშორისო ორგანიზაციის სურსათის ინდექსი აპრილის მდგომარეობით, 30%-ით არის გაზრდილი, რაც რეკორდულად მაღალი მაჩვენებელია”, – განაცხადა ეროვნული ბანკის პრეზიდენტმა.
რაც შეეხება სებ-ის მონეტარულ პოლიტიკას, გვენეტაძის თქმით, ჯერჯერობით ეროვნული ბანკი მკაცრ მონეტარულ პოლიტიკას შეინარჩუნებს:”შევინარჩუნებთ მანამ სანამ არ დავინახავთ, რომ მოლოდინები გრძელვადიან პერიოდში ინფლაციის ზრდასთან დაკავშირებით მოთოკილია”.
