საბაზრო კაპიტალიზაციით უმსხვილესი და მსოფლიოს პირველი კრიპტოვალუტა Bitcoin-ი გაუფასურებას განაგრძობს და, 2020 წლის შემდეგ პირველად, ფსიქოლოგიურ ნიშნულს, 20 000$-ს ჩამოსცდა. Binance-ის სავაჭრო პლატფორმაზე, კრიპტომონეტის განსაკუთრებული ვარდნა 17 ივნისის დღის მეორე ნახევრიდან დაფიქსირდა და მხოლოდ რამდენიმე საათში ის 10%-ით გაუფასურდა.
ღირებულების კლების ტენდენცია გამოვლინდა კაპიტალიზაციის ოდენობით სხვა მსხვილ კრიპტომონეტებშიც, მაგალითად, როგორიცაა ეთერიუმი (ETH), რომლის ფასმა, ბოლო 2 წლის განმავლობაში პირველად, 1000 აშშ დოლარზე ნაკლები გახდა.
უკვე რამდენიმე თვეა, რაც კრიპტოვალუტების ფასი იკლებს. მაისში სტეიბლკოინი TerraUSD ჩამოიშალა, რის გამოც „ქოინი“ LUNA მკვეთრად გაუფასურდა და რამდენიმე დღეში 87 აშშ დოლარიდან 0.000050 აშშ დოლარამდე დაეცა. მომხდარმა კრიპტობაზარზე პანიკა გამოიწვია, მომხმარებლებმა მონეტის გაყიდვა დაიწყეს. მკვეთრად გაზრდილი ტრანზაქციებისა და სავარაუდო თაღლითობის შემთხვევების გამო, მოქმედი სავაჭრო პლატფორმებიდან LUNA Terra გაქრა. 31 მაისიდან, Binance-დან მონეტის შეძენა კვლავ შესაძლებელი გახდა. ამჯერად მისი ფასი 2-დან 3$-ის ფარგლებში მერყეობდა.
რამდენიმე დღის წინ სავაჭრო პლატფორმა Binance-მა ბიტკოინის ტრანზაქციები დროებით შეაჩერა, ისევე, როგორც ერთ-ერთმა ყველაზე მსხვილმა კრიპტო კრედიტორმა, Celsius-მა.
რაც შეეხება კონკრეტულ მიზეზს. რუსეთის უკრაინაში შეჭრიდან მალევე, Bitcoin-მა ეტაპობრივად დაიწყო გაუფასურება. აგრესორი სახელმწიფოსათვის ევროკავშირისა და შეერთებული შტატების მიერ დაწესებულმა სანქციებმა, ასევე, მსოფლიოში შექმნილმა ეკონომიკურმა კრიზისმა აშშ-ს ფედერალურ რეზერვს მონეტარული პოლიტიკის განაკვეთის გაზრდისაკენ უბიძგა. შესაბამისი ზომების გატარების დაანონსების შემდეგ, ვალუტის ღირებულება, დაახლოებით, 10 000 დოლარით შემცირდა.
ქვეყნები რეცესიის მოლოდინში არიან, ინფლაცია და შესაბამისად, საპროცენტო განაკვეთები რეკორდულად იზრდება, წამყვანი ტექნოლოგიური კომპანიების აქციების ფასები ეცემა და ეს ყველაფერი კრიპტოინდუსტრიაზეც მტკივნეულად აისახება. შეერთებულ შტატებში, ბოლო 30 წლის განმავლობაში, ყველაზე მაღალი ინფლაციური მაჩვენებელი დაფიქსირდა.
შეგახსენებთ, 2021 წლის ნოემბერში Bitcoin-ის ფასმა თითქმის 68 000 დოლარს მიაღწია, რაც მისთვის რეკორდული მაჩვენებელი აღმოჩნდა, მას შემდეგ კი კრიპტოვალუტის ფასი მცირდება. ნოემბრის პიკთან შედარებით, დღეს Bitcoin თითქმის 70%-ითაა გაუფასურებული. საერთო ჯამში, კრიპტოვალუტების საბაზრო კაპიტალიზიაცია 3 ტრილიონიდან 835 მილიარდამდეა შემცირებული.
ბოლო რამდენიმე საათის განმავლობაში, Binance-ის პლატფორმაზე დაყრდნობით, ბიტკოინის ფასმა ზრდა დაიწყო, მას შემდეგ, რაც 17-18 ივნისის ღამით მისმა ღირებულებამ თითქმის 17 000$ შეადგინა. ამჟამინდელი მონაცემებით, პირველი კრიპტოქოინის ფასი 20 000-დან 21 000 აშშ დოლარის დიაპაზონში მერყეობს. ექსპერტების განმარტებით, მომდევნო დღეებისა და თვეების განმავლობაში, ბიტკოინის ფასი კიდევ უფრო დაეცემა და, არაა გამორიცხული, 10 000$-იან ნიშნულსაც მიუახლოვდეს, თუმცა საბოლოო ჩამოშლა კრიპტოვალუტას არ ემუქრება.
