მიმდინარე წელს 2021 წლის 1-ელ კვარტალთან შედარებით, პირდაპირი უცხოური ინვესტიციები 4.3-ჯერ გაიზარდა.
კერძოდ, „საქსტატის“ წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2022 წლის 1-ელ კვარტალში 568.2 მლნ. აშშ დოლარი შეადგინა, რაც 435.7 მლნ. აშშ დოლარით ანუ 4.3-ჯერ აღემატება 2021 წლის 1-ლი კვარტალის წინასწარ მონაცემებს.
სტატისტიკის ეროვნული სამსახურის მონაცემებით, ზრდა ძირითადად განპირობებულია სააქციო კაპიტალის და რეინვესტიციის მაჩვენებლების გაზრდით.
შეიძლება ითქვას, რომ მიმდინარე წელს არსებული პირდაპირი უცხოური ინვესტიციების პოზიტიური მაჩვენებლის 50%-ი მოდის გარიგებაზე, რომლითაც ჯივიპის 80%-იანი წილი ესპანურმა კომპანიამ Aqualia-მ იყიდა. აღნიშნული კომპანია უმსხვილეს 10 ინვესტორ საწარმოს შორისაც მოხვდა.
„საქსტატის“ მონაცემებით, 2022 წლის 1-ელ კვარტალში, 10 უმსხვილესი ინვესტორი საწარმოს ჩამონათვალი შემდეგნაირი იყო:
აიდიეს ბორჯომი საქართველო, შპს აიდიეს ბორჯომი ბევერიჯიზ კომპანის საქართველოს ფილიალი;
- შპს მაგთიკომი;
- შპს თბილისი ენერჯი;
- სს ენერგო – პრო ჯორჯია;
- შპს ტავ ურბან საქართველო;
- სს კორპორაცია ფოთის საზღვაო ნავსადგური;
- შპს აკვალია საქართველო;
- სს Hualing international special economic zone;
- სს ბიჯეო ჯგუფი;
- სს მეტრო სითი თრეიდ ცენტრ ბათუმი.
უნდა ითქვას რომ ჩამონათვალი რიგითობის მიხედვით, არ არის დალაგებული.
შეგახსენებთ, რომ მიმდინარე წლის დასაწყისში გავრცელდა ინფორმაცია რომ საქართველოში ერთ-ერთი ყველაზე დიდი წყალგამანაწილებელი კომპანიის “ჯორჯიან უოთერ ენდ ფაუერის” წილები იყიდებოდა. მყიდველი ესპანური კომპანია Aqualia არის. „აქუალიამ“ 180 მილიონი აშშ დოლარის მოცულობის ინვესტიცია განახორციელა, რის სანაცვლოდაც შეიძინა კომპანია Georgian Water and Power-ის 80%-იანი წილი. დანარჩენი 20%-იანი წილის ფლობას კვლავ „საქართველოს კაპიტალი“ განაგრძობს.
